د کندهار په سپين بولدک ولسوالۍ کي په نشه ايي توکو د روږدو کسانو دپاره جوړ سوي مرکز تر دې مهاله سلګونه کسان تداوي کړي او سلګونه نور پکښي تر درملني لاندي دي .
دا مرکز د کندهار د امنيه قوماندان جنرال رازق له لوري جوړ سوی دی ، چي د ډورنډ د کرښي د دواړو غاړو افغان معتادين درملنه کوي .
په دې مرکز دا مهال څلور سوه تنه معتادين تر درملني لاندي او سلګونه نور يې تداوي کړي دي ، دې مرکز ته د ډورنډ د کرښي د دواړو غاړو افغانان ور وستل کيږي .
اوس بستر کسان او د دې مرکز مسوولين د نه امکاناتو څخه په شکايت دي او وايې چي د دوی د درملني دپاره دي اسانتياوي برابري سي او د مرکز د مالي ستونزو غم دي وخوړل سي .
د مرکز مسوول عبدالحق وايې ، چي اوس د دې مرکز مالي ستونزي يوازي د کندهار امنيه قوماندان جنرال عبدالرازق حلوي ، چي بيا هم بسنه نه کوي .
عبدالحق وايې که د مرکز مالي امکانات پوره او ډير سي د مرکز چاري به چټکي سي او د معتادينو د خايدو ظرفيت به ډير سي .
د کندهار امنيه قوماندان جنرال عبدالرازق وايې ، چي د دې مرکز ټول لګښت د کندهار امنيه قومانداني کوي او بل هيڅ اړوند ارګان توجه نه ده ورته کړې .
نوموړی د عامي روغتيا او نشه ايي توکو وزارتونه مسوول ګڼي چي دې مرکز ته توجه وکړي څو چاري يې ښه پر مخ ولاړي سي .
د کندهار امنيه قوماندانۍ د کندهار په ډنډ ولسوالۍ کي هم ورته روغتيايي مرکز جوړ کړی دی چي دا مهال تر درې سوه زيات کسان پکښي تر تداوي لاندي دي .
په دواړو مرکزونو کي ډير هغه کسان سته چي د پوليسو له لوري نيول سوي او بيا دغه مرکزونو ته بيول سوي دي .