په پکتیا ولایت کې د کرنیزو محصولاتو د پروسس او بسته بندۍ دوه مرکزونه جوړ او ګټې اخیستنې ته وسپارل شول.
د پروسس او بسته بندۍ یو مرکز په ګردېز او بل یې په سید کرم ولسوالۍ کې موقعیت لري چې پکتیا ته د کرنې د وزیر د سفر پر مهال پرانیستل شول.
د کرنې وزارت په خبرپاڼه کې راغلي چې د یادو دوو مرکزونو پر جوړولو ۲۳۶ زره امریکايي ډالره لګښت راغلی دی.
هر مرکز په ۲۴ ساعتونو کې د ۷ مټریک ټنه تازه مېوې د پروسس او بسته بندۍ وړتیا لري.
دغه راز د سرچینې د معلوماتو له مخې یاد مرکزونه د مینځلو، پاکولو، بسته بندۍ، زېرمه کولو او وچولو امکانات لري.
دغه مرکزونه د اسیا پراختیایي بانک په مرسته او د دولت پراختیایي بودجې له لارې جوړ شوي دي.
د کرنې وزیر اسدالله ضمیر پکتیا ته د خپل سفر په ترڅ کې په راتلونکي لمریز کال کې په دې ولایت کې د یو شمېر پراختیايي پروژو د عملي کېدو زېری ورکړ. نوموړي وویل، د بڼوالۍ د پراختیا لپاره په پام کې ده چې په راتلونکي کال کې د بڼوالۍ او مالدارۍ له څلورو ولسوالیو څخه نهو ته وغځول شي.
هغه زیاته کړه، چې د دې پروګرام له لارې به ۳۰۰۰ جریبه نوي بڼونه جوړ او زاړه به بیا ورغول شوي.
دغه راز ټاکل شوې چې سږ کال د مېرمنو لپاره په پکتیا ولایت کې د چرګانو ۵۰۰ کوچني فارمونه او ۱۰۰۰ کوچنۍ شنې خونې جوړې شي.
د کرنې وزیر وویل، د اوبو د زېرمه کولو او د اوبولګونې د ستونزو د هواري په موخه په پام کې لرو چې په پکتیا کې ۲۰ د اوبو زېرمه کولو لوی حوضونه جوړ او د دې تر څنګ د اوبو ۵ لوی سربندونه به هم جوړشي.
اسدالله ضمیر همداراز وویل چې په راتلونکي ۱۳۹۵ کال کې به د ۵۰۰۰ ټنو په ظرفیت یوه ستراتېژیکه ذخیره هم جوړه شي.
نوموړي وویل:« د مالدارۍ په برخه کې به ۲۰۰ زره دوزه واکسین په څارویو تطبیق شي او د دې ترڅنګ د مچیو د پراختیا لپاره په دغه ولایت کې ځانګړې برنامې هم لاسه لاندې نیول شوي دي.»
د جلغوزیو د ځنګلونو د سروې لپاره مقدماتې فعالیتونه، د لمریزو واټرپمپونو کارونې تجربه کول، د کرنیزو اصلاح شویو تخمونو او کیمیاوې سرو ویش د کرنې وزارت د برنامو نورې برخې هغه برخې وې چې د کرنې وزیر یې یادونه وکړه.