د کورنيو چارو وزير ننګرهار ته په سفر کې اعلان وکړ چې د پاکستان د ممکنه بريدونو د غبرګون لپاره امنيتي مسوولينو ته د اجرااتو سپارښتنه شوې ده. ډګرجنرال تاج محمد جاهد ننګرهار ته په خپل سفر کې تاييد کړه چې د شمشاد زون، په ٧ ولايتونو کې د وسله والو تحرکات شته، خو دوی يې پر کابو کولو برلاسي دي. نوموړي د ختیځو ولایتونو پر ځينو سيمو د پاکستان بريدونو ته په اشارې وویل، چې په دې تړاو جګپوړو پوځي پلاوو له لعلپورې او ګوشتې ولسواليو ليدنه کړې او دفاعي ځواکونو ته اړینې سپارښتنې هم شوې دي. جاهد دغه راز په ختيځ کې د داعش پر وړاندې پر مبارزې ټينګار وکړ او زياته يې کړه: "وسله وال چې هر څوک وي، زموږ دښمنان دي، داعش چې هر چېرته وي، پر ضد به يې مبارزه جدي وي او له منځه به يوړل شي."