د ننګرهار په نازيانو ولسوالۍ کې د پاڅون کوونکو د يوه قوماندان د کور مخې ته په موټربم چاودنه کې ۱۰تنه وژل شوي او ٢٣ نور ټپيان دي .دغه پېښه تېر ماښام د نازيانو په "لنډۍ "سيمه کې د پاڅون کوونکو د مشر دهقان د کور او قرارګاه مخې ته شوې ده. د ننګرهار د والي وياند عطاءالله خوږياڼی وايي، په دې چاودنه کې ۱۰ تنه وژل شوي او د پاڅونوالو د مشر دهقان او درېيو ماشومانو په ګډون ۲٣ کسه ټپيان شوي دي. د نوموړي په وينا، وژل شوو او ټپيانو کې ځايي ملکي وګړي او هټيوال، ماشومان او څو پاڅون کوونکي هم شامل دي.