د حراست او ثبات ډلې افغانستان کې پر وروستیو نا امنیو د اندېښنې څرګندولو ترڅنګ د ملي یووالي حکومت نا مشروع وباله. د دې ډلې د سیاسي کمیټې مشر او د کورنیو چارو پخواني وزیر عمر داودزي تېره شپه خبریالانو ته د خبرو پر مهال وویل، د ملي یووالي حکومت څو میاشتې وروسته خپل مشروعیت له لاسه ورکوي، چې ورسره سم باید مشروع حکومت رامنځته شي. عمر داودزي د ملي یووالي حکومت د دوو کلونو میلمه وباله او ټینګار یې وکړ، چې افغانان تر دې نېټې وروسته د دغه میلمه کوربه توب نه شي کولای او باید د حل لار ولټوي. نوموړی زیاتوي، د ملي یووالي حکومت باید د تړون تر پایته رسېدو وروسته، چې د دوو کلونو په موخه لاسلیک شوی، د مشروع حکومت د رامنځته کېدو په موخه ټاکنې وکړي. د داودزي په خبره؛ که حکومت د ټاکنو وړتیا او امکانات نه لري، نو اړینه ده، چې د اساسي قانون لویه جرګه جوړه او افغانستان له بې رهبرۍ وژغوري.