د مشرانو جرګې یو شمېر غړي په افغانستان کې د ناټو او امریکايي ځواکونو پر حضور د نیوکې تر څنګ وايي، چې په وارسا کې له شوو ژمنو ښکاري، چې دغه غرب په افغانستان کې سولې ته هیڅ ژمنتیا نه لري. دوی تر ۲۰۲۰م کاله د افغان ځواکونو مالي ملاتړ، د جګړې د دوام په معنا بولي او په دې باور دي، چې تر یادې مودې به افغانستان د ناټو او امریکا په خوښه نا ارامه وي. سناتوران دا څرګندونې داسې مهال کوي، چې تېره ورځ د امریکا دفاع وزیر آشټن کارټر کابل ته د سفر پر مهال وویل، چې ځواکونه یې په افغانستان کې د عملیاتو بشپړ صلاحیت لري. دغه راز څو ورځې وړاندې ولسمشر اوباما اعلان وکړ، چې افغانستان کې ډېر شمېر امریکايي ځواکونو ته اړتیا ده.