د افغانستان په جګړه کې د امریکايي پوځیانو د صلاحیتونو له ډېرېدو وروسته امریکايی پوځیان غواړي چې شینوک هیلیکوپترې، د ملي ګارد پېلوټان او عمله افغانستان ته را ولېږي. د امریکا د پوځ د ویبپاڼې د راپور له مخې، د پوځ پېلوټان او عمله به د نیویارک له راچستر څخه د راتلونکي ۲۰۱۷ کال په لومړیو کې افغانستان ته ولېږل شي. د امریکا د ملي ګارد پېلوټان اوس د پوځ د پلي ځواک له ۲۷ قطعې سره په تعلیمي مرکز کې روزل کېږي. د نیویارک د راچستر هوايي قطعه له شینوک سي ایچ (47) (CH-47) ماډل الوتکو کار اخلي چې د افغانستان د غرنیو سیمو لپاره مناسبې دي. دا هیلکوپترې له ۳۳ تر ۵۵ ټنه جنګي وسایل له ځان سره لېږدولی شي. هغه پوځیان چې د دغه ماموریت لپاره روزل کېږي، له ۲۰۰۷ څخه تر ۲۰۰۸ پورې افغانستان ته لېږل شوي وو او په ۲۰۰۷ م کال کې یې په افغانستان کې په ډيرو هوايي بریدونو کې برخه اخیستې ده.