پخواني ولسمشر، حامد کرزي پر طالبانو غږ وکړ، چې که موخه یې له افغانستانه د امریکا وتل وي، د سولې له پروسې سره دې یوځای شي. کرزي له آلمانۍ ټلویزیوني شبکې، دویچوله سره په مرکه کې ویلي، طالبان د همدې خاورې دي او ډېری یې په خپل هېواد افغانستان کې زېږېدلي دي. هغه پر دې ډلې غږ کړی، چې خپل هېواد ته راوګرځي او نور د بهرني استثمار له منګولو ځانونه خلاص کړي. حامد کرزي په ډاګه کړې، چې له افغانستانه د امریکا وتل، د سولې او خبرو اترو له لارې کیږي او له طالبانو یې غوښتي، چې که موخه یې د امریکا وتل وي، نو د سولې له پروسې سره دې یوځای شي. هغه له افغانستان سره د پاکستان د اړیکو په باب ویلي، چې افغانستان کې د جهاد تر بریالي کېدو وروسته اسلام اباد هیڅکله د کابل پر وړاندې سمه پالیسي غوره نه کړه.