سياسي مکتبونه چې د شلمې پيړۍ د وروستيو لسيزو مشهور ليکوال بهاوالدين پازارګاد علمي اثر دی تکړه، ليکوال او ژورناليست سپين روان نورزي پښتو ته وژباړلو.
دا کتاب په ښه صحافت، ۲۰۱ مخونو او زرو ټوکونو کې د مستقبل خپرندويه ټولنې له خوا چاپ شوی دی، چې ۱۷۸ بېلا بېل سياسي مکتبونه، ايډيالوژۍ او ايزمونه پکې د لغوي معنا، تاريخي شاليد او ايډيالوژيک تفسير سره يو ځآی تشريح شوي دي.
د دې کتاب ژبه روانه او ساده ده، لوستونکی په اسانۍ سره کولای شي ترې مفهوم افاده کړي. بله ښه ځانګړنه يې دا ده چې ټول عنوانونه يې د الفبا په اساس ترتيب شوي دي.
لکه څه ډول چې ده په سريزه کې يادونه کړي، د کتاب د ليکوال په قول دا په اصل کې د نړۍ سياسي تاريخ دی، چې مختصر ډول ليکل شوی دی.
دا کتاب د سياست، ادبياتو او نورو ټولنيزو علومو زده کوونکو او مينه والو لپاره ډير مهم او با ارزښته اثر ګڼلی شو، ځکه دوی د هرې تيورۍ د مطالعې په ترڅ کې د بېلا بېلو ايزمونو له نومونو سره مخامخ کيږي خو ښايي ډير يې د دوی لپاره ګونګ وي. کله چې دې کتاب ته مراجعه وکړي نو ستونزه به يې حل شي.
دا د سپين روان نورزي دوهمه ژباړه ده چې لومړۍ د هلن شاختر اثر بريالي شخصيت مشاور په پښتو ژباړلی و.