میرویس جلالزی
د افغانستان د کرکیټ لوبډلې دکویټې په سیالیو کې د جمعې په ورځ د نیپال د لوبډلې په ماتولو سره د دغو سیالیو لومړۍ مقام خپل کړ.
افغان کرکیټ بازانو په پينځه نوې منډوخپل حریف په ګونډو کړ.
تر دې دمخه د کویټ د اې سې سې په سیالیو کې افغان ټیم دوه لوبې ګټلي وي خو له اماراتو څخه یې ماتې خوړلي وه.
د جمعې په ورځ د افغانستان لوبغاړي په بي ساري توګه ښه وځلیدل او دغه قوي او غښتلي لوبډله یې په ګونډو او خپل ملي بیرغ یې په ډولونو او اتڼونو سره د هغو مسافرو افغانانو په منځ کې ورپاوه چې د کویټ د مسابقو سیالیو ته را ټول شوي ول.
افغان کرکیټ بازانو د شاوخوا پینځه زرو تنو کویټ میشتو افغانانو له لوري په ډولونو او د پیسو په شیندلو بدرګه کیدل او ټاکل شوي چې هیواد ته به ډیر ژر را ستانه شي.
ټاکل شوي چې افغان کرکیټ بازان به د مې میاشتې په لومړۍ نیټه د ویست انډیز په سیالیو کې لومړۍ له هند او وروسته له جنوبي افریقا سره لوبې وکړي.
