بې توله توليد

دا د شپږمې   (ب)  ټولګی دی  درسي ساعت  يې  د  پښتو مضمون   دی خو د ښوونکي د ناروغتيا او ناسوبتيا له کبله  د ښوونځي  مدير بل   ښوونکی شپږمې  (ب) ټولګي ته  راولېږه  ٠  ښوونکي  زده کوونکيو ته وويل ستاسې  درسي ساعت پښتو ده  خو زه د جغرافيي استاذ يم ٠ اوس ستاسې خوښه چې پښتو  ووايوو او که د جغرافيې  په هکله  پوښتنې او معلومات  در کړم ؟
ګلاليو ماشومانو په يوه خوله ورغبرګه  کړه  جغرافيه!!
ښوونکي د جغرافيې تر تعريف او لږې تشريح  وروسته  له  زده کوونکيو  پوښتنې  پيل کړې ٠
ښه څوک ويلای شي چې زموږ په طبيعت کې کوم توکي  ډېر دي  او زموږ  توليدات  څه دي ؟
ټولو زده کوونکيو لاسونه پورته کړل ، استاذ يوه  ته وويل : ښه شاباس ته يې  ووايه ٠ زده کوونکی  ودرېد او ويې ويل : استاذه  زموږ توليدات  ډېر دي لکه انګور، انار، خټکي او نارنجان او٠٠٠٠٠٠٠٠٠ښوونکی مسکی شو او زده کوونکي ته يې وويل :  نه بچييه دا خو ټول  زموږ د ګران هېواد حاصيلات دي او په ځمکو کې کيږي ٠ زما پوښتنه د توليداتو په هکله وه يعنې موږ څه شي پخپله  جوړولی شوو؟
زده کوونکيو بيا ګوتې  پورته کړې ، ښوونکي  يوه  زده کوونکي ته  ګوته ونيوه ، ښه ګرانه  ته ووايه  چې زموږ  توليدات څه شی دي ؟
زده کوونکي   وويل : استاذه  زموږ توليدات  شعرونه  او سندرې دي ٠
ښوونکي په کړس کړس وخندل  ورو  د  زده کوونکي  خواته   ورغلو پر سر يې  ورته  لاس  تېر کړ او بيا يې ترې وپوښتل  چې څنګه ؟
زده کوونکی  وويل : زما پلار ، درې  ترونه ، څلور مې ماماګان ،دوه  وروڼه او  يوه مې هم  خور ټول شاعران دي  او هر يو د ورځې  څو درجنه  نوي   نوي  پښتو شعرونه توليدوي٠
دجغرافيې  ښوونکي   اسويلی  وويست  او ويې  ويل  هو  له بده  مرغه چې  دغه بې کيفيت توليد  اوس ټول مارکيټ نيولی  دی٠