د حکومت له بې کفایتۍ جنايي او امنیتي پېښې ډېرې شوې دي

په وروستیو کې په کابل ښار کې جنايي او امنیتي پېښو خلک اندېښمن کړي دي او پر حکومت تور پورې کوي چې د خلکو د امنیت په خونديتوب کې پاتې راغلی دی. غلا، تښتونې او هدفي وژنې هغه څه دي چې په دې وروستیو کې د هېواد په یو شمېر لویو ښارونو او په ځانګړې توګه په کابل کې ډېر شوي دي. خلک او شنونکي امنیتي ادارو ته ګوته نیسي چې په وینا یې د امنیتي ادارو کې د بې کفایته او غیر مسلکي چارواکو له امله د نا امنۍ پېښې ډېرې شوې دي. د هدفي وژنو او نا امنیو په لړ کې د یکشنبې مازدیګر د کابل د پنځمې حوزې په سیمه کې د ولسي جرګې د یوه وکیل انجنیر شېرولي وردګ د کور مخې ته یو ماین ځای پر ځای شوی و چې په خپله انجنیر شېرولي وردګ په کې ووژل شو. دغه راز د کابل ښار په بېلابېلو برخو کې هره ورځ د غلا، انسان تښتونې او وژنو لسګونه پېښې رامنځته کېږي. د کابل زیاتره ښاریان شکایت کوي چې د پولیسو او د امنیتي پوستو په خوله کې په رڼا ورځ خلک تښتول کېږي او په رڼا ورځ د ښار په منځ کې د خلکو کورونه لوټل کېږي، خو پولیس او د جنايي جرمونو پر وړاندې د مبارزې اداره یې مخنیوی نه کوي. دغو پېښو د خلکو رواني او فزیکي امنیت زیانمن کړی دی. د پوځي چارو کارپوه جنرال عتیق الله امرخېل وايي چې د حکومت د کمزوري مدیریت او ادارې له امله د هېواد امنیتي وضعیت ورځ تر بلې ترینګلی کېږي. نوموړي سرنوشت ته وویل چې حکومت ان د خپلو کارکوونکو امنیت نه شي خوندي کولی او هره ورځ د وسله والو په بریدونو کې لسګونه ملکي او نظامي مامورین په شهادت رسېږي. ده زیاته کړه، په امنیتي ادارو کې د بې کفایته کسانو موجودیت لامل شوی دی چې د کابل په ګډون د هېواد په ټولو سیمو کې د امنیتي او جنايي پېښو ګراف لوړ شي. د پوځي چارو کارپوه جنرال عبدالواحد طاقت هم وايي چې د امنیتي ادارو ضعف جنایتکارو او ورانکارو ډلو ته په خلاص مټ د فعالیت زمینه برابره کړې ده او پلازمېنه چې باید له امنیتي پلوه د هېواد د نورو سیمو په پرتله خوندي وي، نن سبا پر تر ټولو نا امنه سیمه بدله شوې ده. نوموړي پر حکومت نیوکه وکړه چې د کورنیو چارو وزارت په څېر په مهمو امنیتي ارګانونو کې غیر مسلکي کسان مقرر شوي او همدا د نا امنیو یو ستر لامل کېدای شي. د هغه په وینا، د کمزوري مدیریت له امله نه یوازې په کابل، بلکې د هېواد په نورو ولایتونو کې هم امنیتي پېښې خورا ډېرې شوې دي چې هلمند یې ژوندی مثال دی. له هلمنده راپورونه وايي چې په دغه ولایت کې د وروستیو جګړو په ترڅ کې سلګونو افغان سرتېرو ته مرګ ژوبله اوښتې ده. سیمه ییز چارواکي په خپله اعتراف کوي چې د هلمند او یو شمېر نورو سیمو نا امني د امنیتي ادارو او چارواکو تر منځ د نه همغږۍ له امله دي. پر دې سربېره، پر عدلي او قضايي ادارو هم د وسله والو مخالفینو بریدونه زیات شوي دي. شنونکي وايي چې حکومت په خپله په لوی لاس تاوتریخوالي ته زمینه سازي کوي او بیا د خپلو ناسمو پرېکړو د احتمالي غبرګونونو پر وړاندې لازم تدابیر هم نه لري. حکومت تر اوسه په دې اړه څه نه دي ویلي چې د قاضیانو او څارنوالانو د خوندیتوب لپاره به څه کوي.