له قران څخه تلاوت بهتردئ اوکه له يادڅخه :

مفتي   : 

 ستر علمي او روحاني شخصيت عَلامه مُحَقِّقْ مُحَمّدْ مُعِينُ الدِّين أبوالفضل أفغاني ، کانَ اللهُ له ودَامَت برکاته  .

مستفتيه   :      فاطمه  زهراء  ــ  د قرآن حافظه / پاکستان /پشتونخوا .
 
د افغانانو د سر تاج ستر مذهبي عالم علامه أبوالفضل صاحب ته نيکي هيلي او سلامونه وړاندي کوم ، له محترم مولوي صاحب څخه ځما پوشتنه داده چی د کوم چا چي قران پاک په ياد وي نو ايا په ياد تلاوت کول يې ثواب لري او که قران کريم ته په کتلو سره يې ثواب زيات دی  ؟ د جواب په انتظار

الجواب ومنه الصواب :

نحمده ونصلي علي رسوله الکريم :

کچيري حافظ حفظ د قرآنکريم پوخ کړئ ؤ ، او د حفظ د پخيدو پخاطر يې تلاوت نکوئ بلکي د ثواب په نيت يې کوئ ، نو بيا دَئ بايد په خپل ځان کښي وګوري چي ايا دَئ چي په ياد قرآنکريم وايي نو توجه ، حضور ، خشوع او عاجزي يې په تلاوت کښي ډيره وي ، او که يې په هغه صورت کښي خشوع او عاجزي ډيره وي چي و قرآنکريم ته ګوري او تلاوت يې کوي  ،  او کې په دواړو صورتو کښي حضور او عاجزي بې تفاوته دئ  ؟ 
په اخيري صورت کښي له قرآنکريم څخه تلاوت کول أفضل دئ ؛ ځکه چي اجتماع (يوځائ والئ) د دوو عبادتو راځي  : اول نظر و قرآنکريم ته او دوهم تلاوت  .
او په اولو دوو صورتو کښي بيا هغه صورت أفضل دئ چي په هغه کښي دده د زړه حضور او د بدن خشوع او عاجزي ډيره وي   .

[طحطاوي ج۱ ص ۲۸ ، ۲۹]  .
والسلام ومن الله التوفيق  .