عبدالهادي ریشاء – کراچي ٢ غويی ١٣٨٤
نن په نړۍ هرلور ته دآزادۍ او ډيموکراسۍ د ډول آوازونه دليري ا وريدل کيږي . دا ږغونه دغه سي هواته پورته ځي او تر اورید لو وروسته پسي ورکيږي . اولنو به ويل چي : دډول ږغ دليري ښه راځي . رشتيايې ويل، اوس هم هغه سي ده، چي ږغ نزدې راسي بې سوري يې واورېدل سي ، ولي نن چي څوک د آزادۍ خبري کوي ، دبيري ( ډاره ) - شا وخوا ګوري، لکه اوخۍ چي یې خوري ، په خبرویې بې سوري ګډه وي - ځان نه ايله کوي، ملامت یې مه بوله خواران دونه ځوکلېدلي دي - داسي داختناق دورې پر راغلي دي ، چي هجران یې ورښوولی دئ . چاچي به سپوڼ وواهه ، ها بل به ورته وويل : ٬
چپ سه !
اوس دېوالونه خبري کوي .
نن چي دخوش باورانو په نظر يوڅه د رڼا چوله معلوميږي او دآزادۍ د ډول ږغ دليري راځي، نو دا خوش باوره، لړمون پخته ګان غواړي، چي څوڼي غوړي - ږمونځ کي او د دې کاذب ډاله ږغ ته په اتڼ ورګډسي . امابرعکس زمانې او حوادثو اکثره کسان دونه په حقايقو پوهولي دي، چي نور (کلپي نه پر چليږي) خو ګولۍ پر چلېدلی سي . دوی د اوسنۍ آزادۍ او ديموکراسۍ جريانونه (خوشي دوړي بولي) ، اوس لاهم (توبه د مړؤ خالي نه ده) شکر دی په جامعه کي د ځوانو- اصيلو مفکورو خاوندان او دخلګو په درد دردېدلي مړونه سته .
څرګنديږي، چي دآينده پاره دخلګو درک او دوربيني موجوده ده او دا د عا دي سړو کار هم نه دئ .
که څوک دخلګوسره کښېني او وپوښتل سي ددوی په نظر کي خورا ښه پيغامونه ، واقعیتونه ، دردونه او خواخوږۍ پروتي اونغښي ليدل کيږي . چټي اپلاکي نه وایي . دوی دبې وسه مظلومانو پله نيسي . که د دوی نظر ښه څر ګند کړه سي په نړۍ کي د نا خوالو او نا پېښو د ملامتيا لښتی کښته مخ پر لوېديځ باسي .
په نړۍ کي دانسانانو اکثريت بې وسه او کمواکه کسان دي . دوی د اذله کمزوري نه دي راغلي بلکه وروسته د زوردارانو له خوا کار پرسوی دئ -کمزوره اوکمواکه سوي دي .
نن چي قدرتمندان غورې وهي او پرکمزورو بړ بړ وایي - دا خواران کم بغلي لا پسي ځیځېر ي اوکوټي ، په دې کي زورواکان او ټوپکسالاران خپله بقاء ويني، چي تل پر خپل قدرت باندي پاته وي او ټوله نعمتونه او هستۍ په خپل واک کي وساتي ، خو هوښياران نه بايد، چي دونه حريص اومغروره و اوسي يا په اصطلاح ځان ځني ورک سي، چي دخپلي با دارۍ د پاره دا خاکي کره ( نړۍ ) دغلامۍ لور ته ورګېل کي او په غلطه سره انسانانو ته دآزادۍ او ډيموکراسۍ ډول ، چی نن ورځ په لاس ورغلی دئ لاندي باندي وډبوي .
زه چی ګورم په نړۍ کي زما په سترګو سوچه-خواپاکې ، نه آزادي او نه ډيموکراسي ليدل کيږي . خو ږغ یې غوږ ته راځي ، نوکه له ما څوک پوښتنه وکي ، چي ته څه وایې- څنګه به سي ؟ زه به یې پاکه محمدي ورته وکم، چي په اصطلاح (خبره غړکه ده) دنړۍ لوی اکثريت داسلحه دارانو ترتور او پېڅول لاندي په تورو ورځو اوشپوکي د آزادۍ او ډيموکراسۍ په تور کي ګير بولم ، خو تر اوسه زما څخه چا پوښتنه نده کړې .
